Бүгүн, 29-апрелде Жогорку Кеңештин пленардык жыйынында депутат Гүля Кожокулова Бишкек мэриясынын аткаминерлери «Өлбөс полк» жөө жүрүшүнүн уюштуруучуларын тоготпой жатканына нааразычылыгын билдирди.

Ал бүгүнкү күндө кыргызстандыктарды тынчсыздандырган эң маанилүү маселе — эң маанилүү майрамдардын бири болгон Жеңиш күнүнө байланыштуу экенин белгиледи.

«Бул Улуу Ата Мекендик согуш жылдарында курман болгон биздин баатырларыбыздын, жакындарыбыздын элесине таазим кылуу күнү. Бишкек мэриясы «Кыргызстандын өлбөс полкунун» уюштуруучуларын тоготпой, 9-майда салтанаттуу марш болобу же жокпу деген суроого жооп бербей жатканы кандай? Эмне үчүн уюштуруучулардын суроосу жоопсуз калууда, эмне үчүн алар ЖМКлар жана брифингдер аркылуу жүрүштү өткөрүүгө уруксат суроого мажбур болуп жатышат, маселе эмнеде?» — деп суроо салды парламентарий.

Кожокулова патриоттуулук жана идеология сыяктуу түшүнүктөр кайда жоголду деп кызыкты.

Депутат ошондой эле мындай кырдаалда жаш муундун көзүн кантип карайбыз деп таң калуусун билдирди.

«Бул майрам Кыргызстанда өзгөчө орунга ээ. Өткөн жылы биз Жеңиш күнүнүн 80 жылдыгын белгиледик, азыр согуштун балдары 80 жашта жана андан улуу, небере-чеберелери өз чоң аталарын жана тылдагы эмгекчи айымдарыбызды эскерип жатышат. Ал эми биз азыр буга көз жумуп жатабыз. Эмне үчүн, маселе эмнеде? Эмне үчүн аймактарда уюштуруучулардын суроолоруна дароо жооп беришет, ал эми Бишкек мэриясы эмнени күтүп жатат? Эмне үчүн биз муниципалитетке бул тууралуу дайыма эскертип турушубуз керек? Менимче, бул иштер алдын ала иштелип чыгышы керек болчу. Урматтуу кесиптештер, биз бул эсте каларлык датаны унутууга акыбыз жок, биз ага таазим кылышыбыз керек, анткени согуш жылдарында канчалаган адамдар дайынсыз жоголду…» — деди Кожокулова.

Анын айтымында, Бишкек мэриясы чечим кабыл алып эле тим болбостон, мындай маанилүү окуялар боюнча кайрылууларга реакция кылбаган кызматкерлерге тиешелүү чараларды көрүшү керек.