Грек-рим күрөшү боюнча балбан Асан Жанышов Албанияда өтүп жаткан 23 жашка чейинки (U-23) спортчулар арасындагы дүйнө биринчилигинде коло байге үчүн күрөшөт.

Жанышов 87 кг салмакта күч сынашууда. Ал килемге 22-октябрда чыгып, таймашты 1/16 финалдан баштаган. Ал катары менен венесуэлалык, армениялык жана украиналык атаандаштарын жеңип, жарым финалга чыккан. Бирок жарым финалда бейтарап туу менен чыгып жаткан Ауес Гонибовго 1:3 эсебинде жеңилип, коло байге үчүн күрөшө турган болду.

Коло үчүн беттеш бүгүн, 23-октябрда өтөт. Финалдык кармаштар саат 22:00до башталат.

Азырынча Асан Жанышовдун атаандашы белгилүү боло элек.

Дүйнө биринчилиги 21-октябрда башталган, 27-октябрда жыйынтыкталат.