Улуттук банк Кыргызстандын жарандары үчүн эл аралык QR-төлөмдөр кызматы ишке киргизилгенин жарыялады. Жаңы кызмат колдонуучуларга чет өлкөлөрдө кошумча тиркемелерди орнотпостон төлөм жүргүзүүгө шарт түзөт.

Эми «Элкарт Мобайл» мобилдик тиркемесинин колдонуучулары дүйнөнүн 60тан ашуун өлкөсүндө жана аймактарында Alipay+ бирдиктүү QR төлөм инфраструктурасы аркылуу товарлар жана кызматтар үчүн төлөмдөрдү жүргүзө алышат. Төлөмдөр тиркеме аркылуу QR-кодду сканерлөө жолу менен аткарылат.

Бул долбоор «Банктар аралык процессинг борбору» ЖАКы («Элкарт») менен Alipay+ платформасы биргеликте ишке ашырган. «БПБ» ЖАК Улуттук банктын туунду уюму болуп саналат.

Маалымат үчүн:

• «БПБ» ЖАК (Элкарт) — Кыргызстандын улуттук төлөм системасынын оператору. Компания өлкөнүн бирдиктүү төлөм мейкиндигинин иштешин камсыз кылат жана финансы институттарын бириктирет.
• Alipay+ — Ant International тарабынан иштелип чыккан эл аралык санарип төлөмдөр платформасы. Платформа дүйнөдөгү электрондук капчыктарды жана төлөм тиркемелерин бириктирип, чет өлкөлөрдө төлөм жүргүзүүгө мүмкүнчүлүк берет.