31-август күнү Алай районунун Нура айылында жайгашкан «Эркечтам» унаа токтотуучу жайында күзөт кызматкерлери менен Кытай жарандарынын ортосунда пикир келишпестик чыгып, күзөт кызматынын кызматкери асманга үч жолу ок чыгарды. Бул тууралуу Ош ОИИБден билдиришти.

Маалыматка караганда, түшүндүрүү иштеринин жүрүшүндө тараптар ортосунда кайым айтышуу жаралып, чыр урушка айланган. Жаңы маалымат боюнча, Кытайдын 9 жараны жана күзөт кызматындагы 2 кызматкер РИИБге жеткирилип, суракка алынды. Текшерүүнүн жүрүшүндө Кытайдын 6 жараны мас абалда болгону аныкталган.

Учурда окуя боюнча тиешелүү экспертизалар дайындалып, тергөө алды текшерүү иштери уланууда.