Гуманитардык адистикти бүтүргөндөргө айрым учурларда «Бул диплом менен кайда иштейсиң?» деген суроо берилет. Бирок гуманитардык билим адамды терең ойлонууга, башкаларды түшүнүүгө жана маселелерди ар тараптан талдоого үйрөтөт. Мындай жөндөмдөр чоң компанияларда абдан керек. КРСУнун философия факультетинде алган билими «Kulikov» кондитердик үйүнүн корпоративдик маданиятын башкарууга кандай жардам берди? КВН оюну жана студенттик кезиндеги кечелер анын мүнөзүн кантип калыптандырды? Антропологияны окуу азыркы HR тармагында кандай пайдасын тийгизет? Бул тууралуу «Kulikov» компаниясынын корпоративдик окутуу жана маданият бөлүмүнүн жетекчиси Дмитрий Ефремов Reporter.kg’ге берген маегинде айтып берди.

— Дмитрий, КРСУга кантип тапшырып калдыңыз? Эмне үчүн философияны тандадыңыз?

— Мен 2009-жылы бюджеттик бөлүмгө тапшыргам. Мектепте окуп жүргөндө техникалык багытка жакын болчумун. Компьютерге кызыкчумун, ошондуктан айланамдагылардын баары IT же башка техникалык кесипти тандайт деп ойлошкон. Бирок жогорку класстарда кызыгуум өзгөрүп, гуманитардык багытка өтүп кеттим. Классташтарымдын бири философияга тапшырарын айтты. Ал мага: «Философия — абдан күчтүү база. Владимир Жириновский менен Роза Отунбаева да философия боюнча билим алышкан», — деп айтып калды. Мен анын сөзүнө ишенип, философияны тандадым.

Кирүү экзамендеринде «Заманыбыздын баатыры» чыгармасы боюнча эссе жазганбыз. Натыйжада бюджетке өткөндөрдүн алдыңкы бештигине кирдим. Окууга өткөндөрдүн тизмесин көргөнү барганым эсимде. Өзүмдүн атымды көрүп, кнопкалуу телефонум менен бардык туугандарыма чалып, сүйүнчүлөп чыккам. Ал эми бул саамалыкты шаурма сатып алып белгилегем. 2009-жылы студент үчүн шаурма күнүмдүк эле тамак эмес, өзгөчө майрамдык тамак болчу.

— Университеттеги алагчкы күнүңүз эмнеси менен эсиңизде калды?

— Биринчи сентябрь болчу. Башкы корпуста Александр Пушкиндин эстелигинин жанында салтанаттуу иш-чара өттү. Күн абдан ысык эле. Салтанаттуу сөздөрдөн кийин факультеттерге тарашыбызды айтышты. Анан бүт группабыз менен башкы корпустан гуманитардык корпуска жөө жөнөдүк. Ошол жолдо бири-бирибиз менен таанышып, жакындан сүйлөшө баштаганбыз. Бул биздин биринчи жолу чогуу басып өткөн жолубуз болду.

— Студенттик жашоо сабак менен эле чектелбейт эмеспи. Окуудан тышкаркы иш-чаралар сизге кандай таасир берди?

— КВН менин жашоомдо чоң роль ойноду. Кыргызстандын Жогорку лигасында «Волшебник Гудвин» командасында ойнодум. Университетке чейин өзүмө анча ишене бербеген, тартынчаак жигит болчумун. Сахнага чыкканда өзүмдү эркин сезе албагандыктан, көп учурда мага чоң ролдорду беришчү эмес. Бирок тамаша жазганды жакшы билчүмүн.

Биринчи курста мен авторлош болгон тамашалардын бир бөлүгү Кыргызстандын КВНинин расмий сайтында сезондун мыкты номерлеринин катарына кирди. Бул мен үчүн чоң окуя болду. Өзүмдүн чыгармачылык жөндөмүмө ишене баштадым. Кийин КВН мага өзүмдү эркин алып жүрүүгө жардам берди. Университетте студенттикке кабыл алуу иш-чараларын алып бара баштадым. Факультеттин Ачык эшиктер күнүнө карата өзүбүз тасма тартчубуз.

Бирок КВНге көп убакыт бөлө баштаганда окуум начарлай баштады. Ошондуктан ага бир аз этият мамиле кылууга туура келди. Ошентсе да КВН мага эл алдында сүйлөөнү жана адамдар менен иштөөнү үйрөттү.

— КРСУнун студенттик чөйрөсү өзүнүн өзгөчө атмосферасы менен белгилүү. Студенттик жылдарыңыздан эмнелер эсиңизде калды?

— Биринчи кезекте славян деген сөз эсимде. Биз университетти расмий түрдө КРСУ деп көп айта берчү эмеспиз. Өз ара көбүнчө Славян деп сүйлөчүбүз. Кызыктуу окуялар да көп болгон. Гуманитардык факультеттин өзүнүн стадиону жок эле. Ошондуктан дене тарбия сабагына эртең мененки саат 7:30да Табигый-техникалык факультеттин оюн талаасына барышыбыз керек болчу. Мен эртең менен эрте спорт менен алектенүүгө даяр эмес экенимди тез эле түшүндүм. Студенттик поликлиникадан текшерүүдөн өтүп, дене тарбиядан бошотулдум. Ошондон кийин КРСУнун поликлиникасын жакшы жаттап калдым.

Ал кезде ар бир факультеттин өзүнүн аброю бар эле. Машина студенттер үчүн кымбат нерсе болчу. Гуманитардык факультеттин студенттери көбүнчө жөө басып, автобус же велосипед менен жүрүшчү. Ал эми юридикалык факультеттин жанындагы унаа токтотуучу жай кымбат машиналарга толуп турчу. Менимче, бул көрүнүш азыр да өзгөрө элек.

Гуманитардык факультеттин короосунда эски, бош советтик бассейн бар эле. Студенттер ошол жерге чогулуп, сүйлөшүп, талашып-тартышып отурушчу. Кээде сабакка да кирбей калчубуз. Ал эми студенттик жашоосу кызуу өткөндөр үчүн «Нептун» деген жер өзүнчө белгилүү болчу. Ал Табигый-техникалык факультеттин жанындагы кичинекей дүкөн эле. Ал жерде тамак-аш жана суусундуктар арзан сатылчу. Студенттердин акчасы көп эмес болгондуктан, ошол жерге көп барчубуз. Азыр ал жерде «Мадина» базарына кеткен жол бар. Бирок көптөгөн бүтүрүүчүлөр үчүн «Нептун» дагы деле студенттик жылдардын эсте калган жерлеринин бири.

— Бүгүн философия факультетинде алган билимиңизге кандай баа бересиз?

— КРСУдагы философия мектеби өлкөдөгү эң күчтүү мектептердин бири болчу. Кафедраны түзгөн жана өнүктүргөн мугалимдердин арасында Москва мамлекеттик университетинде билим алган белгилүү адистер бар эле. Тилекке каршы, Аскар Чукутаевич азыр арабызда жок. Бирок ал сыяктуу мугалимдер абдан бийик деңгээлдеги адамдар болчу. Алар бизге жөн гана китептеги маалыматтарды үйрөтүшкөн эмес. Сабактарда көп талашып-тартышчубуз, ар кандай өз пикирлерибизди айтчубуз. Мугалимдер жаман көрбөй, тескерисинче муну колдоп турушчу.

Айрым түшүнүктөр жана терминдер абдан татаал эле. Азыр кесиптик чөйрөдө «антагонизм» сыяктуу татаал сөздөрдү уксам, университеттеги күндөр эсиме түшөт.

Философия мага терең ойлонууга, маселени ар тараптан кароого жана өз оюмду негиздөөгө үйрөттү. Бул мен үчүн чоң мектеп болду.

— КРСУну бүткөндөн кийин карьераңыз кандай өнүктү?

— Менин жолум оңой болгон жок. Философияны бүткөндөн кийин журналистика боюнча кошумча билим алдым. Редакцияларда иштей баштаганда мага көп учурда: «Сенин тексттериң абдан бышып калган экен. Адатта журналистика факультетин бүтүргөндөр мындай деңгээлге кийинчерээк жетет», — деп айтышчу. Менимче, буга философия боюнча алган билимимдин таасири чоң болгон. КРСУдагы окуу терең ойлонууга, талдоого жана маанилүү нерсени табууга үйрөттү. Ошол эле учурда иш-чараларды алып барып акча таба баштадым. Бир убакта шоу-бизнес көбүрөөк киреше алып келип, толугу менен ошол тармакка өтүп кеттим.

Бирок убакыттын өтүшү менен иш-чараларды алып баруу тармагы мага тар болуп калды. Той-топурларды жана юбилейлерди алып баруу кызыктуу болгону менен, мен издеген тереңдикти бере алган жок.

Кийин КРСУнун гуманитардык факультетин бүтүргөн, менден улуу адамдар менен тааныштым. Алардын арасында психология бөлүмүн бүтүргөн, Sun People компаниясынын негиздөөчүсү Сергей Долженков да бар болчу. Алар корпоративдик кардарлар менен жана мазмундуу бизнес иш-чаралары менен иштеген компания түзүшкөн. Мен дал ушул тармактан өзүм издеп жүргөн тереңдикти таптым. Ошентип, акырындык менен тажрыйба топтоп, өсүп отуруп, Kulikov компаниясына келдим. Азыр бул жерде корпоративдик окутуу жана компаниядагы маданият тармагын жетектейм.

— Философия боюнча алган билимиңиз Kulikov сыяктуу чоң компанияда кызматкерлер менен иштөөгө кандай жардам берет?

— Бул жерде түз байланыш бар. Европада HR адистерин даярдоодо адамды түшүнүүгө чоң көңүл бурулат. Антропология деген илим адамды, анын жүрүм-турумун жана коомдогу ордун изилдейт.

КРСУда бизге адамды жана коомду түшүнүүгө жардам берген сабактар жакшы окутулчу. Мага бул билим азыркы жумушумда абдан жардам берет. Адамдардын бири-бири менен кандай мамиле түзөрүн, ар кандай чөйрөдө кандай баалуулуктар бар экенин түшүнүү окутуу программаларын түзүүдө жана компания ичиндеги байланышты жакшыртууда маанилүү.

Терең билим, чыгармачылык жана көп нерсени көрүп-билүү да бул иште керек. Мунун баарынын негизин мен университетте алдым.

— Kulikov компаниясында КРСУнун бүтүрүүчүлөрү көп иштейби?

— Ооба. КРСУнун бүтүрүүчүлөрүндө өзгөчө бир жакындык бар деп айтсам болот. Кимдир бирөө сенин «Славянда» окуганыңды укканда, дароо жылмайып калат. Бул бизди бириктирген жалпы тажрыйба сыяктуу.

Биздин компанияда КРСУну бүтүргөндөр көп. HR бөлүмүндө 20дай адам иштейт. Алардын бешөө — КРСУнун бүтүрүүчүлөрү.

Kulikov компаниясында иштөө абдан кызыктуу. Биздин бренддин күчү — адамдарда. Командабыз өз ишин чындап жакшы көрөт. Компания кызматкерлердин өсүшүнө мүмкүнчүлүк берет. Мен өзүм бул жерге окутуу боюнча жөнөкөй менеджер болуп келгем. Бүгүн болсо бүтүндөй бир тармакты жетектеп жатам.

Компанияда мындан башка да жакшы мисалдар бар. Айрым кызматкерлер өндүрүштө жүк ташуучу болуп иштеп баштап, кийин башкы кеңседе ийгиликтүү иштеп калышкан.

— Азыр окуусун аяктап, чоң турмушка кадам таштап жаткан КРСУнун бүтүрүүчүлөрүнө кандай кеңеш берет элеңиз?

— Студенттик жылдарыңызда болуп жаткан ар бир нерсе кийин керек боло турган тажрыйба болуп калат. Азыр сизге айрым сабактар, тааныштар же башыңыздан өткөн окуялар эмне үчүн керек экенин түшүнүү кыйын болушу мүмкүн.

Бирок кийин бизнес кура баштаганда, карьераңызды өнүктүргөндө же жашооңузду өзгөрткөндө ошол нерселердин баары сизге жардам берет.

Андыктан студенттик жылдарыңыздагы эч бир мүмкүнчүлүктү колдон чыгарбаңыз. Студенттик кез — жашоодогу эң сонун мезгилдердин бири. Аны мүмкүн болушунча пайдалуу өткөрүңүз.

КРСУнун алгачкы жалпы бүтүрүү аземин утурлай

Маекте сөз болгон кесиптик байланыштарды сактоо жана адистерди даярдоо маселелери КРСУнун алдыдагы майрамында да негизги темалардын бири болот.

25-июлда «Жаштык Аренада» университеттин 33 жылдык тарыхында биринчи жолу жалпы университеттик бүтүрүү аземи өтөт. Ага бүтүрүүчүлөр, мугалимдер, ата-энелер жана Кыргызстандан жана Россиядан келген ардактуу коноктор катышат.

Быйыл КРСУ менен КРСУ колледжинин бакалавр, адистик, магистр жана ординатор программаларын аяктаган 1 128 бүтүрүүчүсү диплом алат. Окууда, илимий жана коомдук иштерде өзгөчөлөнгөн мыкты студенттер сыйлыктар жана артыкчылык диплому менен белгиленет.

Майрамдын маанилүү окуяларынын бири — КРСУнун бүтүрүүчүлөр ассоциациясынын түзүлөрү тууралуу жарыяланат. Бул бирикме ар кайсы жылдары окуу жайды бүтүргөн адистердин байланышын бекемдөөгө жана алардын кесиптик кызматташуусуна шарт түзүүгө багытталат.

33 жыл ичинде КРСУ Кыргызстан менен Россиянын экономикасы, билим берүү, саламаттык сактоо жана мамлекеттик башкаруу тармактарында эмгектенип жаткан дээрлик 40 миң адис даярдады.

Рубрики: Жаңылыктар, Илим-билим, Коом, Макалалар, эксклюзив

Теги: КРСУ