Кийинки пандемия сөзсүз болот, ошондуктан дүйнө ага азыртан даярданышы керек. Бул тууралуу БУУнун башкы катчысы Антониу Гутерриш Нью-Йоркто пандемияларга даярдык көрүү маселесине арналган жогорку деңгээлдеги жолугушуунун катышуучуларына жолдогон кайрылуусунда билдирди. Анын сөзүн БУУнун башкы катчысынын биринчи орун басары Амина Мохаммед окуп берди.

Гутерриш коронавирус пандемиясы азыркы өз ара байланышкан дүйнөдө бир дагы өлкө мындай коркунучтардан өз алдынча коргоно албасын көрсөткөнүн эске салды.

Анын айтымында, 2023-жылы пандемиялар боюнча саясий декларация кабыл алынгандан кийин бир катар жылыштар болду. Атап айтканда, Эл аралык медициналык-санитардык эрежелерге өзгөртүүлөр киргизилип, ДССУнун пандемияларга каршы күрөшүү боюнча келишими кабыл алынды.

Эми өлкөлөр патогендерге жетүү жана пайданы бөлүштүрүү системасын (PABS) макулдашышы керек. Бул механизм кооптуу вирустардын үлгүлөрүн тез алмашууга жана медициналык каражаттарга адилеттүү жетүүгө шарт түзүүгө тийиш.

ДССУнун башкы директору Тедрос Адханом Гебрейесус сүйлөшүүлөрдү мүмкүн болушунча тез арада аяктоого чакырды.

«Биз дүйнө даяр деп айта албайбыз. Коркунуч өзгөрүүдө, биз да өзгөрүшүбүз керек», — деди ДССУнун башчысы.

Гутерриш менен Гебрейесус Конго Демократиялык Республикасындагы Эбола безгегинин азыркы очогу жугуштуу оорулар канчалык олуттуу коркунуч бойдон калып жатканын дагы бир жолу көрсөтүп жатканын белгилешти.

Ошол эле учурда мындай коркунучтарга көңүл буруунун тез азайып кетиши негизги көйгөйлөрдүн бири бойдон калууда. Жаңы вирус пайда болгондо өлкөлөр каражат бөлүп, убадаларды беришет, бирок оору басаңдагандан кийин жаңы эпидемияларга даярдык көрүүгө болгон көңүл азаят.

Гутерриш көңүл буруу зарыл болгон үч негизги багытты атады. Алар — инфекцияларды аныктоо жана жайылышын чектөө боюнча жергиликтүү системаларды туруктуу каржылоо, адамдардын ден соолугун жаныбарлардын жана айлана-чөйрөнүн абалы менен байланыштырган «Бирдиктүү ден соолук» концепциясын өнүктүрүү, ошондой эле өлкөлөрдүн дары-дармектерге, вакциналарга жана башка медициналык каражаттарга тең жетүүсүн камсыз кылуу.

«Адилеттүүлүк — бул тандоо эмес, бул негиз. Бардык өлкөлөр адам өмүрүн сактап калуучу каражаттарга жетүүгө муктаж», — деди БУУнун башкы катчысы.

Ал кийинки пандемия жөн гана болжолдуу сценарий эмес, келечекте сөзсүз боло турган көрүнүш экенин белгилеп, ага даярдыкты кийинкиге калтырбоого чакырды.

«Бул сыноодон өтүү үчүн колдон келгендин баарын жасайлы», — деди Гутерриш.