Кыргызстандын Ички иштер министрлиги жарандарды социалдык тармактарда тараган маалыматтарды сын көз караш менен баалап, расмий булактарга гана ишенүүгө чакырды.

Мекемеден билдиришкендей, текшерилбеген маалыматтар, чагымчыл жарыялоолор жана жалган билдирүүлөр адамдарды адаштырып, коомдук чыңалууну жаратып, улуттар аралык ынтымакка терс таасир тийгизиши мүмкүн.

ИИМ жарандарды чагымчыл аракеттерге алдырбоого, текшерилбеген маалыматтарды таратпоого жана маалыматтык мейкиндикте жоопкерчиликтүү болууга үндөдү.

«Жарандыгына, улутуна жана коомдогу социалдык абалына карабастан мыйзам баарына бирдей. Мыйзам талаптарын бузган ар бир учур белгиленген тартипте укуктук баасын алат», — деп белгилешти министрликтен.

Ошондой эле ведомство бири-бирин урматтоого, улуттар аралык ынтымакты бекемдөөгө жана маалыматтын ишенимдүү булактарына гана таянууга чакырды.