Кыргызстандын президенти Садыр Жапаров Ысык-Көл облусуна болгон жумушчу сапарынын алкагында Каракол шаарындагы балык чарбасын жана кеме курууну өнүктүрүү боюнча инвестициялык долбоорлор менен таанышты.

Мамлекет башчысынын басма сөз кызматы билдиргендей, балык чарбасы Ысык-Көлдүн биологиялык ар түрдүүлүгүн калыбына келтирүүгө багытталат.

Долбоор көлгө кийин коё берүү үчүн чабак жана сига балыгын көбөйтүүнү, ошондой эле коммерциялык максатта форель жана келечекте судак өстүрүүнү караштырат.

Ишкананын долбоордук кубаттуулугу жылына 2 миң тоннага чейин балыкты түзөт. Курулуш 2026-жылдын июнь айында башталган, аны ноябрь айында бүтүрүү пландалууда.

Ишканада заманбап инженердик чечимдер, анын ичинде 33 балык өстүрүүчү бассейн жана булгоочу заттарды такыр чыгарбаган сууну тазалоо системасы колдонулат. Комплексти электр энергиясы менен күн панелдери камсыздайт.

Долбоор чабактарды (малька) инкубациялоодон баштап даяр продукцияны чыгарууга чейинки толук өндүрүштүк циклди камтыйт. Ишкана ички рынокту жаңы муздатылган балык менен камсыздап, жаңы жумуш орундарын түзөрү, ошондой эле продукцияны Россия менен Кытайга экспорттоого мүмкүндүк берери күтүлүүдө.

Мамлекет башчысына ошондой эле суу сыйымдуулугу 350 тоннага чейинки кемелерди чогултуу комплексинин долбоору тааныштырылды. Концепция суу чөйрөсүнө зыяндуу заттарды чыгарбаган электр кыймылдаткычтары бар кемелерди чыгарууну караштырат.

Комплекстин курамына кеме куруучу ангар жана эки кабаттуу административдик-тиричилик имараты кирет. Объекттин жалпы аянты 2,5 миң чарчы метрди түзүп, ишканада 120 жумуш ордун түзүү пландалууда.

Долбоорлор менен таанышкан соң Садыр Жапаров аларды өз убагында ишке ашырууну, экологиялык талаптарды сактоону жана аткарылган иштердин жогорку сапатын камсыз кылууну тапшырды.