Көк бөрү жана көкпар боюнча улуттук курама команданын белгилүү оюнчусу Манас Ниязов Reporter.kg басылмасына берген маегинде алдыдагы беттештерден күтүүлөрү менен бөлүшүп, өлкө жетекчилигинин насааттары тууралуу айтып берди.

Анын айтымында, Дүйнөлүк көчмөндөр оюндары башталардын алдында улуттук курама команданы президент кабыл алып, татыктуу жана таза оюн көрсөтүүгө, ошондой эле мелдештин конокторун жогорку деңгээлде тосуп алууга чакырган.

Ниязов команда жеңишке жетүү мүмкүнчүлүгүн жогорулатуу үчүн эки топко бөлүнгөнүн — бул эки команда тең жыйынтыгында ийгиликке жетиши үчүн жасалган кадам экенин билдирди.

Спортчу Кыргызстандын курама командасына Казакстандын командасы олуттуу атаандаштык түзөрүн белгиледи. Алар өтө жакшы даярдык менен келип, отузга жакын атын ала келишкен, айрым жылкыларын Кыргызстандан эле сатып алышкан. Ниязовдун сөзү боюнча, казакстандыктар оюндун жогорку деңгээлин көрсөтүп жатышат, андыктан финалда кызыктуу жана курч тирешүү күтүлүүдө. Ошондой эле ал Тажикстан жана Өзбекстандын курама командаларынын даярдыгы жогору экенин кошумчалады.

Ийгиликтин сыры тууралуу суроого жооп берип жатып, Ниязов аны талыкпаган эмгек, тартип жана үй-бүлөлүк салт менен байланыштырды. Анын бүтүндөй үй-бүлөсү муундан муунга бул спорт түрү менен алектенип келе жаткан тукум кууган улакчылар экенин белгиледи.

Спортчу ат тандоо өзгөчө көңүлдү талап кылаарын — анын көлөмү, мүнөзү жана ылдамдыгы маанилүү экенин, эң башкысы — чабендес менен аттын ортосундагы өз ара түшүнүшүү керектигин айтты. Анын айтымында, ар бир оюнчу үчүн өзүнүн «тили табылган» атты табуу абдан татаал.

Бойка аттуу белгилүү тулпары сагынабы деген суроого Ниязов аны чындап эле сагынарын моюнга алып, аны эч ким алмаштыра албасын баса белгиледи.