Казакстанда Кыргызстандын жаранынан жалпы салмагы 2,8 килограммды түзгөн алты алтын куймасы конфискацияланды. Ал бул алтындарды Кытайга мыйзамсыз алып өтүүгө аракет кылган. Бул тууралуу Казакстандын Башкы транспорттук прокуратурасы билдирди.

Ведомствонун маалыматы боюнча, аял алтынды «Кордай Авто» өткөрүү пункту жана «Хоргос» эл аралык чек ара кызматташтык борбору аркылуу алып өтүүгө аракет кылган.

Куймаларды бажы көзөмөлүнөн жашыруу үчүн ал бут кийиминин таманынын алдына (стелькасынын алдына) — ар бир бут кийимине үчтөн катып алган. Куймалардагы алтындын курамы 99%дан ашкан. Алардын жалпы баасы 182,3 миллион теңгени (болжол менен 35,1 миллион сом же 401,6 миң доллар) түздү.

Казакстандагы соттун чечими менен алтын куймалары сотко чейинки тартипте конфискацияланып, мамлекеттин кирешесине өткөрүлдү.