Бүгүн, 12-майда, Инвестициялар боюнча улуттук агенттик менен «Агро Куш» компаниясы инвестициялык келишимге кол коюшту. Документке агенттиктин башчысы Равшанбек Сабиров жана «Агро Куштун» башкы директору Аскат Абдрахманов кол койду.

Анын алкагында Чүй облусунун Кемин районунда «Иштеп жаткан канаттуулар комплексин жаңы өндүрүштүк кубаттуулуктарды куруу аркылуу кеңейтүү» долбоору ишке ашырылат. Долбоор 24 канаттуулар короосун жана саатына 30 тонна жем чыгаруучу заводду курууну камтыйт.

Долбоорго салынган инвестициянын жалпы көлөмү 1,7 миллиард сомдон ашат. Бул демилге агроөнөр жай секторун өнүктүрүүгө, өндүрүштү көбөйтүүгө жана аймакта жаңы жумуш орундарын түзүүгө багытталган.