Кыргызстандын ресторан жана мейманкана бизнесинин өкүлдөрүн бириктирген «Хорека Клуб» ассоциациясы коомдук тамактануу чөйрөсү үчүн 5% өлчөмүндөгү бирдиктүү салык ставкасын киргизүү боюнча өкмөттүн демилгесине каршы чыкты. Бизнес-коомчулук мындай чечим маржиналдуулуктун (кирешелүүлүктүн) төмөндөшү шартында иштеп жаткан мекемелерге каржылык жүктөмдү олуттуу жогорулатарын эскертти.

Ассоциациянын төрайымы Г. Раимбекова түшүндүргөндөй, Бишкекте накталай эмес төлөмдөр басымдуулук кылат, мында ишкерлер банктарга эквайринг үчүн кошумча 1,5%дан 3%га чейин комиссия төлөшөт. Тамак-аш азыктарына баалардын тынымсыз өсүшүн, ижара акысын, коммуналдык кызматтарга кеткен чыгымдарды жана салыктарды төлөөнү (анын ичинде курамында кант бар суусундуктарга акцизди) эске алганда, 5%дык бирдиктүү ставка ар бири 25ке чейин жумушчу орун менен камсыз кылган мекемелердин туруктуулугуна коркунуч жаратышы мүмкүн.

Альтернатива катары «Хорека Клуб» Министрлер Кабинетине дифференцияланган (айырмаланган) ставканы (накталай эмес эсептешүүлөр үчүн 3% жана накталай эсептешүүлөр үчүн 5%) сактап калууну же төлөмдүн бардык түрлөрү үчүн салыктын бирдиктүү ставкасын 3% деңгээлинде белгилөөнү сунуштайт. Ассоциация тармактын туруктуулугун жана жумуш орундарын сактап калууга мүмкүндүк берүүчү тең салмактуу салык режимин иштеп чыгуу үчүн мамлекеттик органдар менен конструктивдүү диалогго даяр экендигин билдирди.

Эскерте кетсек, президенттин жарлыгына ылайык, мончо комплекстери жана сауналар үчүн салык жүгү мурдагы 8%дан 5%га чейин төмөндөтүлөт. Коомдук тамактануу чөйрөсүндө жаңы эрежелер Бишкек жана Ош шаарларында иштеген мекемелер үчүн 5% өлчөмүндөгү ставканы белгилейт, ал эми республиканын калган бардык аймактары үчүн салык 3%га чейин төмөндөтүлгөн.