Нарын облусунун Кочкор районунда баасы 30 млн 500 миң сомду түзгөн айдоо жери мамлекетке кайтарылды. Бул тууралуу Башкы прокуратура билдирди.

Маалыматка ылайык, Кочкор райондук прокуратурасы Чолпон айыл аймагындагы жер мыйзамдарынын сакталышын текшерген. Анын жүрүшүндө «Эрсары-Шайтан-Кашар» тилкесиндеги 30 гектар сугат айдоо жери 1996-жылы мыйзамсыз түрдө жеке дыйкан чарбасына 99 жылга берилип кеткени аныкталган.

Прокуратуранын чаралары жана соттук териштирүүлөрдүн натыйжасында жер тилкесин берүү боюнча актылар жараксыз деп табылган. Аталган жер Чолпон айыл аймагынын муниципалдык менчигине кайтарылган.