VI Дүйнөлүк көчмөндөр оюндарында Кыргызстан медалдык эсеп боюнча алдыда келе жатат. 2-сентябрга карата Кыргызстандын куржунунда 9 алтын, 6 күмүш жана 2 коло — жалпы 17 медаль бар. Бул тууралуу Дене тарбия жана спорт агенттиги билдирди.

Командалык эсепте экинчи болуп Орусия келе жатат. Бул өлкөдө 12 медаль: 2 алтын, 4 күмүш жана 6 коло бар. Ал эми Казакстан 7 медаль: 2 алтын, 1 күмүш жана 4 коло менен үчүнчү орунда келе жатат.

Дүйнөлүк көчмөндөр оюндарынын спорттук мелдештери Ысык-Көл облусунда өтүүдө. Ага дүйнөнүн 112 өлкөсүнөн келген спортчулар катышып, спорттун 42 түрү боюнча күч сынашууда. Спорттук мелдештер 6-сентябрга чейин уланат.