Кыргызстанда VI Дүйнөлүк көчмөндөр оюндарына даярдыктын алкагында өлкөдөгү ири эл аралык иш-чаралардын бирине маалыматтык колдоо көрсөтө турган ыкчам медиа-штаб түзүлдү.

Штабдын курамына Оюндарды даярдоого жана өткөрүүгө тартылган мамлекеттик органдардын жана уюмдардын басма сөз кызматтарынын өкүлдөрү кирди. Штабдын негизги милдети — бардык басма сөз кызматтарынын ишин координациялоо, иш-чаралардын логистикасын жана медиа коштоосун уюштуруу, ошондой эле уюштуруучулар менен жалпыга маалымдоо каражаттарынын өкүлдөрүнүн ыкчам байланышын камсыз кылуу. Бул коомчулукка маалыматты өз убагында жана так жеткирүүгө багытталган.

Бүгүнкү күндө Оюндарды чагылдыруу үчүн 250 чет элдик жана 700гө жакын жергиликтүү журналист аккредитациядан өттү. ЖМК өкүлдөрүнүн көптүгүнө байланыштуу уюштуруучулар алардын ишин координациялоого жана иштөөсүнө ыңгайлуу шарттарды түзүүгө өзгөчө көңүл бурууда.

Журналисттерге ыңгайлуу болушу үчүн Оюндардын негизги аянтчаларында өзүнчө пресс-борборлор уюштурулат. Ачылыш күнүндө пресс-борбор «Бишкек Арена» аймагында иштейт. Ысык-Көлдө ал «Газпром» ден соолукту чыңдоо дене тарбия комплексинин базасында, ал эми «Кырчын» этномаданий комплексинин аймагында дагы бир өзүнчө пресс-борбор жайгашат.

Мелдештер жана маданий иш-чаралар өтүп жаткан мезгилде медиа-штаб туруктуу режимде иштейт. Кызматкерлер расмий билдирүүлөрдү, пресс-релиздерди, комментарийлерди, фото жана видеоматериалдарды даярдап, таратып, ошондой эле жеринде журналисттердин ишин координациялайт.

Иштин өзүнчө багыты — окуяларга жана штаттан тышкаркы кырдаалдарга ыкчам жооп берүү. Маалыматтар чогултулуп, текшерилип, тиешелүү кызматтар менен макулдашылгандан кийин расмий булактар аркылуу коомчулукка жеткирилет.

Мындан тышкары, штаб ЖМКларга жана социалдык тармактарга туруктуу мониторинг жүргүзүп, Оюндарды өткөрүүгө байланыштуу так эмес маалыматтарды өз убагында аныктап, төгүндөп турат.