VI Дүйнөлүк көчмөндөр оюндарынын алкагында 6-сентябрга пландаштырылган көк бөрү жана көкпар боюнча финалдык беттештерге бардык билеттер толугу менен сатылып бүттү. Уюштуруу комитети «Көк бөрү» аренасына кирүүгө кирүү билети барларга гана уруксат берилерин — билети жок көрүүчүлөр трибунага киргизилбей турганын баса белгиледи.

Билет сатып алууга жетишпей калгандар үчүн Бает айылында, көлдүн жээгинде («Ак-Марал» жана «Чайка» пансионаттарынын ортосунда) атайын фан-аймак уюштурулат. Ал жерде чечүүчү ат оюндарынын түз алып берүүлөрүн реалдуу убакыт режиминде чогуу жана акысыз көрүү үчүн алп экран орнотулат.

Мындан тышкары, алтын үчүн болгон таймаштарды телеканалдардын түз эфиринен, ошондой эле алардын расмий социалдык тармактарынан байкоого болот. Күйөрмандарды коомдук тартипти сактоого жана расмий кулактандырууларга көңүл бурууга чакырышат.