Конго Демократиялык Республикасында Эбола ысытмасынын жайылышы уланууда. Эпидемия жарыялангандан бери эки ай ичинде 2 миң 73 учур катталып, 796 адам каза болду. Бул тууралуу Дүйнөлүк саламаттык сактоо уюму билдирди.

Учурдагы эпидемия Бундибуджио вирусунан улам келип чыккан. Ал байкоо жүргүзүлө баштагандан берки үчүнчү эң ири эпидемия болуп калды. Илдет мурунку эпидемияларга салыштырмалуу кыйла ылдам жайылууда. Мисалы, 3-июлга карата тастыкталган учурлардын саны 1 миң 502 болуп, алардын 473ү каза болгон.

Эң оор кырдаал Итури провинциясында сакталууда. ДССУнун маалыматына ылайык, жаңы аныкталган бейтаптардын көбү мурда белгилүү болгон байланыштагы адамдардын тизмесине кирген эмес. Бул вирустун аныкталбай калган жугуу чынжырлары дагы эле бар экенин көрсөтөт.

Ошондой эле каза болгондордун көпчүлүгү медициналык мекемелерден тышкары жерде көз жумуп жатканы тынчсызданууну жаратууда. Бейтаптар өз убагында медициналык жардам ала албай калууда.

ДССУ Конго Демократиялык Республикасынын бийлиги жана эл аралык өнөктөштөрү менен биргеликте эпидемияга каршы чараларды күчөтүүдө. Дарылоо орундарын жана лабораториялардын санын көбөйтүү, байланышта болгондорду көзөмөлдөө жана жергиликтүү медицина кызматкерлерин окутуу иштери жүргүзүлүүдө.

Бундибуджио вирусунан келип чыккан Эболага каршы азырынча расмий бекитилген вакцина же дарылоо ыкмасы жок. Өлкөдө эксперименталдык дары-дармектер менен вакциналардын клиникалык сыноолору өтүп жатат. Июль айынын башында ДССУ бул вирус түрүн аныктоого арналган биринчи молекулярдык тестти өзгөчө кырдаалда колдонууга уруксат берген.

Эпидемияга каршы күрөшкө куралдуу жаңжал жана жабыркаган аймактарга жетүүнүн чектелиши тоскоол болууда. ДССУ биргелешкен аракеттер планын толук ишке ашыруу үчүн кошумча каржылоо зарыл экенин белгиледи.