Бишкекте 10-октябрда Чүй облусунун түзүлгөндүгүнүн 100 жылдыгына арналган маданий-көргөзмө программасы өттү. Бул тууралуу Министрлер кабинетинин басма сөз кызматы билдирди.

Салтанаттуу иш-чарага Министрлер кабинетинин төрагасы Адылбек Касымалиев катышты.

Турдакун Усубалиев атындагы аянтта аймактын экономикалык, маданий жана социалдык жетишкендиктерине арналган көргөзмөлөр уюштурулду.

Жогорку Кеңештин депутаттары, мамлекеттик жана жергиликтүү өз алдынча башкаруу органдарынын өкүлдөрү, коомдук ишмерлер, чет элдик коноктор жана борбор калаанын тургундары этнографиялык шаарчаны кыдырышты. Анда улуттук каада-салттар, элдик кол өнөрчүлөрдүн буюмдары жана кыргыз ашканасынын тамак-аштары тартууланды.

Ошондой эле Чүй облусунун ишканаларынын продукциялары коюлган өнөр жай жана ишкердик көргөзмөсү өттү. Жаштардын инновациялык долбоорлоруна жана жаш ойлоп табуучулардын эмгектерине өзгөчө көңүл бурулду.

Мааракенин алкагында улуттук сый тамак — узундугу 128 метр болгон жылкы этинен чучук жасалды.

Майрамдык программа ошондой эле концертти, маданий-зоок иш-чараларын жана балдар аянтчаларын камтыды.