Коронавируска байланыштуу өлкөдөгү мектептер карантинге жабылбайт. Бул тууралуу Саламаттык сактоо министри Космосбек Чолпонбаев Бишкекте өткөн маалымат жыйында билдирди.

“Биз бул маселени штабда карадык. Негизи карантиндин да өзүнүн эрежелери бар. Эгер окуучулардын 25 пайызы сабакка келбей калса карантин жарыяланат. Билим берүү министрлигинин маалыматына ылайык, бүгүнкү күндө мектептерде сабакка келгендер 95 пайызды түзүүдө. Мындан улам мекетептерде карантин жарыялоого негиз жок. Окуучулар 20-мартта каникулга тарайт”, – деди Чолпонбаев.

Коронавирустун алдын алуу боюнча республикалык штабдын маалыматына караганда, Кыргызстанда илдетке чалдыккандар катталган жок. Бардык тиешелүү мекемелер  күчөтүлгөн тартипте иш алып барышууда.