«Кыргызстан аэропорттору» ААК Бишкек менен Шанхайдын ортосунда түз авиакаттам ачуу боюнча Кытайдын China Eastern Airlines авиакомпаниясы менен сүйлөшүүлөрдү жүргүзүүдө. Бул тууралуу компаниянын басма сөз кызматы билдирди.

Маалыматка ылайык, тараптар Шанхай — Бишкек — Шанхай багыты боюнча түз авиакаттамды ишке киргизүү мүмкүнчүлүгүн талкуулашты.

Кыргызстандык компаниянын башкармалыгынын төрагасы Манасбек Самидинов жаңы каттамды ачуу – республиканы эл аралык авиация тармагына интеграциялоо стратегиясынын бир бөлүгү экенин белгиледи.

«Биз Кытайдын эң ири авиакомпанияларынын бири — China Eastern Airlines жетекчилиги менен сүйлөшүүлөрдү өткөрдүк. Шанхай — Бишкек — Шанхай багыты боюнча түз авиакаттамды ишке киргизүү маселесин талкууладык. Бул – Кыргызстанды дүйнөгө таанытып, жарандарыбызга саякаттоо, бизнес жана эл аралык кызматташуу үчүн жаңы мүмкүнчүлүктөрдү түзүү максатында биз ырааттуу иштеп жаткан долбоор», — деди ал.