Кыргызстандын президенти Садыр Жапаров АКШнын Түштүк жана Борбор Азия иштери боюнча атайын өкүлү, Кошмо Штаттардын Индиядагы элчиси Сержио Гор менен жолугушту. Бул тууралуу мамлекет башчысынын басма сөз кызматы билдирет.

Гор Кыргызстанга VI Дүйнөлүк көчмөндөр оюндарынын ачылыш аземине катышуу үчүн келген.

Басма сөз кызматынын маалыматы боюнча, тараптар кыргыз-америка мамилелерин мындан ары өнүктүрүүнү, саясий диалогду бекемдөөнү, ошондой эле соода-экономикалык жана инвестициялык кызматташтыкты кеңейтүүнү талкуулашты.

«Борбор Азия + АКШ» (С5+1) форматындагы өз ара алакаларга өзгөчө көңүл бурулду. Алсак, тараптар 2027-жылы бул форматта мамлекет башчыларынын экинчи саммитин өткөрүү келечегин карап чыгышты.

Жолугушуунун жүрүшүндө Жапаров Кыргызстандын 2027–2028-жылдарга БУУнун Коопсуздук Кеңешинин туруктуу эмес мүчөсү болуп шайланышына байланыштуу куттуктоолору үчүн Горго ыраазычылык билдирди.

Эки өлкөнүн экономикалык кызматташтыгы дагы бир тема болду. Тараптар B5+1 платформасынын ишкер байланыштарды өнүктүрүүдөгү жана Кыргызстан менен АКШнын бизнесинин ортосунда өз ара кызматташуу үчүн жаңы мүмкүнчүлүктөрдү жаратуудагы ролун белгилешти.

Өзүнчө Садыр Жапаров АКШга барууну каалаган Кыргызстандын жарандары үчүн визалык талаптарды жеңилдетүү маселесин көтөрдү.

Тактап айтканда, виза процедураларын жеңилдетүү боюнча практикалык чечимдерди издөө мүмкүнчүлүгү, анын ичинде визалык депозит (visa bond) киргизүү талабы, ошондой эле тиешелүү чектөөлөрдү кайра карап чыгуу мүмкүнчүлүгү талкууланды.

Сержио Гор мамлекет башчысынын сунуштарын колдоого алып, кыргыз-америка мамилелерин мындан ары да бекемдөөгө көмөктөшүүгө даяр экенин билдирди.

Жолугушуунун аягында Садыр Жапаров АКШнын президенти Дональд Трампка салам жолдоп, Дүйнөлүк көчмөндөр оюндарына катышып жаткан америкалык спортчуларга ийгиликтерди каалады.