Бишкектеги «Жаштык Арена» комплексинде 15–17-октябрь күндөрү эки эл аралык көргөзмө — Kyrgyzstan Expo – 2026 жана Expo Eurasia Kyrgyzstan – 2026 бир убакта өтөт. Бул тууралуу Соода-өнөр жай палатасынын (СӨЖП) вице-президенти Авазбек Керимбаев билдирди. Бир аянтчага кыргызстандык өндүрүүчүлөр, чет өлкөлөрдөгү ири ишканалардын өкүлдөрү, мамлекеттик органдар, тармактык бирикмелер жана эл аралык бизнес чогулат.

СӨЖП Kyrgyzstan Expo көргөзмөсүн жыл сайын өткөрүп келет. Бул жолу Россиянын Zarubezh-Expo акционердик коому көргөзмөлөрдү биргелешип өткөрүүнү сунуштаган.

«Россия Кыргызстандын ири соода-экономикалык өнөктөшү болгондуктан, бул сунуш кабыл алынды», — деди Керимбаев.

Анын айтымында, көргөзмөгө Россиянын 100дөн ашык компаниясы келет. Кыргызстандык өндүрүүчүлөр ички рынокко жана экспортко арналган продукцияларын көрсөтүшөт.

Kyrgyzstan Expo – 2026 көргөзмөсүнүн уюштуруучусу — СӨЖП. Ага Кыргызстан, Россия, Кытай, Түркия, Өзбекстан, Пакистан жана Афганистандын компаниялары катышары күтүлүүдө. Катышуучулардын арасында өнөр жай, энергетика, тоо-кен, курулуш, айыл чарба, транспорттук-логистика, медицина жана технология тармактарындагы ишканалар бар.

Ишкердик программанын алкагында СӨЖП менен Zarubezh-Expo кызматташтык жөнүндө меморандумга кол коюшат. Документ биргелешкен көргөзмө-жарманке ишмердүүлүгүн өнүктүрүүгө, эл аралык көргөзмөлөрдү жана ишкердик иш-чараларды уюштурууга, ошондой эле кыргызстандык ишканалардын чет өлкөлөрдөгү көргөзмө долбоорлоруна катышуусун кеңейтүүгө багытталган.