16-октябрда Каракол шаарында «Открыткаларга түшпөгөн Кыргызстан» аттуу фотовыставка ачылат. Аны «Стрит-гудит» көчө фотографтарынын коомчулугу уюштурду. Көргөзмөдө өлкөнүн ар кайсы шаарларынан келген 50дөн ашык автордун эмгектери көрсөтүлөт. Алар кесипкөй фотографтар же сүрөтчүлөр эмес, көпчүлүгү сүрөттөрдү телефонго тартышкан. Алар адатта открыткаларга түшпөй калган көрүнүштөрдү чагылдырышат.

Көргөзмөнүн негизги суроосу — эмнени искусство деп эсептөөгө болот жана аны жаратууга кимдин укугу бар? Уюштуруучулардын пикиринде, фотоискусство кооз жерлерди, архитектуралык эстеликтерди жана жаратылыш көрүнүштөрүн тартуу менен гана чектелбейт. Искусствого болгон укук да, шаарга болгон укук сыяктуу эле, ар бир адамга таандык. Көрүүчүлөр көргөн эмгектерин искусство деп эсептейби же жокпу, өз пикирин билдире алышат. Бул үчүн добуш берүү үкөктөрү коюлуп, жыйынтыгы көргөзмөнүн акыркы күнү жарыяланат.

Катышууга арыздар 27-сентябрга чейин кабыл алынган. Каалаган адам катыша алган: көркөм билимдин, кесипкөй техниканын же көргөзмөлөргө катышуу тажрыйбасынын болушу талап кылынган эмес. Кыргыз, орус жана англис тилдериндеги сүрөттөр, фоторепортаждар, видеолор, инсталляциялар, перформанстар жана фотозиндер кабыл алынган.

Эмгектер беш тема боюнча чогултулган:

• «Шаар кимге таандык?»
• «Шаардагы туристтер көп барбаган жерлер» — короолор, жайма базарлар, огороддор жана жол көрсөткүчтөргө кирбеген «үчүнчү жайлар».
• «Заманбап чакырыктар» — климат, абанын сапаты, мобилдүүлүк, сууга жеткиликтүүлүк жана тарыхый эс тутум.
• «Guilty pleasure» — кубаныч тартуулаган, бирок бир аз уялткан нерселер.
• «Эркин тема».

Көргөзмөнүн ачылышы 16-октябрда саат 15:00дө Каракол шаарындагы автобекетте өтөт. Дареги: Пржевальский көчөсү, 149.

Көргөзмө 31-октябрга чейин күн сайын саат 8:00дөн 19:00гө чейин иштейт. Кирүү акысыз.