Кыргызстанда тик учакты колдонуу менен тоолуу аймактарда издөө-куткаруу иштерин жүргүзүү боюнча экинчи биргелешкен кыргыз-француз машыгуусу аяктады, деп билдирет КР ӨКМдин басма сөз кызматы.

Мекеменин маалыматына ылайык, 29-июндан 4-июлга чейин КР ӨКМге караштуу «Авиациялык издөө-куткаруу кызматы» мамлекеттик ишканасынын базасында тик учакты колдонуу менен тоолуу аймактарда издөө-куткаруу иштерин жүргүзүү боюнча экинчи биргелешкен кыргыз-француз тренинги болуп өттү.

Практикалык сабактарды француз инструкторлору өткөрүштү. Окутуунун жүрүшүндө Кыргызстандын ӨКМнин учкучтары жана куткаруучулары аба кемелеринин экипаждары менен куткаруу бөлүмдөрүнүн өз ара аракеттенүүсүн өркүндөтүп, жетүүгө кыйын болгон аймактарга өздүк курамды түшүрүү, ошондой эле бийик тоолуу шарттарда жабыркагандарды коопсуз эвакуациялоо ыкмаларын машыгышты.

Тренингдин алкагында Өзгөчө кырдаалдар министринин биринчи орун басары Азамат Мазариповдун Франциянын Кыргызстандагы Атайын жана Ыйгарым укуктуу Элчиси Николя Фай менен жолугушуусу дагы болуп өттү.

Тараптар жарандык коргонуу чөйрөсүндөгү, ошондой эле авиациялык-куткаруу мүмкүнчүлүктөрүн өнүктүрүү боюнча кызматташтыктын учурдагы абалын жана келечегин талкуулашты. Мындай тренингдерди өткөрүү куткаруучулардын кесиптик даярдыгын жогорулатууга, практикалык көндүмдөрүн бекемдөөгө жана эл аралык тажрыйба алмашууга өбөлгө түзөрү белгиленди.

Жолугушуунун жыйынтыгында Кыргызстан менен Франция кызматташтыкты мындан ары өнүктүрүүгө, биргелешкен билим берүү программаларын улантууга жана Кыргызстандын ӨКМнин авиациялык-куткаруу потенциалын бекемдөөгө өз ара кызыкдар экендиктерин ырасташты.