Кыргызстандын коргоо министри Руслан Мукамбетов 1-сентябрда Бишкек шаарында Түркиянын улуттук коргоо министри Яшар Гүлер менен жолугушту. Бул тууралуу КР Коргоо министрлигинин басма сөз кызматы билдирет.

Жолугушуу Шанхай кызматташтык уюмунун (ШКУ) иш-чараларынын алкагында өттү. Яшар Гүлер Бишкекке Түркиянын президенти Режеп Тайып Эрдоган жетектеген түрк делегациясынын курамында келген.

Тараптар кыргыз-түрк аскердик кызматташтыгынын учурдагы абалын жана аны андан ары өнүктүрүүнүн келечектүү багыттарын талкуулашты.

Эки мамлекеттин коргоо ведомстволорунун ортосундагы өз ара аракеттенүүнү чыңдоого, тажрыйба алмашууга, аскердик кадрларды даярдоого жана биргелешкен иш-чараларды өткөрүүгө өзгөчө көңүл бурулду.

Мукамбетов Кыргызстан менен Түркиянын ортосундагы мамилелердин жогорку деңгээлин белгиледи. Анын айтымында, аскердик кызматташтык эки өлкөнүн өз ара аракеттенүүсүнүн артыкчылыктуу багыттарынын бири болуп саналат.

Өз кезегинде Гүлер Түркия Кыргызстан менен аскердик жана аскердик-техникалык чөйрөлөрдө кызматташтыкты андан ары өнүктүрүүгө даяр экенин билдирди.

Жолугушуунун жыйынтыгында тараптар кызматташтыкты кеңейтүүгө, кесиптик байланыштарды чыңдоого жана коргоо чөйрөсүндө өз ара пайдалуу аракеттенүүнү өнүктүрүүгө кызыкдар экендиктерин билдиришти.