Кыргызстандын соттук-эксперттери Жогорку Соттук-эксперттик кызматтын төрагасы Талантбек Кожонов баштаган делегациянын курамында Антальяда өткөн XXI «Соттук медицинанын күндөрү» эл аралык конгрессине катышты.

Эл аралык форумга 40 өлкөдөн болжол менен 1150 катышуучу — алдыңкы окумуштуулар, соттук эксперттер, укук коргоо органдарынын жана илимий мекемелердин өкүлдөрү чогулду. Конгресстин алкагында соттук токсикология, генетика, санариптик криминалистика, жасалма интеллект, массалык кырсыктарда каза болгондорду идентификациялоо жана башка актуалдуу багыттар боюнча 28 илимий сессия өттү.

Талантбек Кожонов эл аралык кызматташтыктын, кесиптик тажрыйба алмашуунун жана эксперттик изилдөөлөрдүн заманбап ыкмаларын өнүктүрүүнүн маанилүүлүгүн белгиледи.

«Биздин улуттук мыйзамдарыбыз ар башка, эксперттик ишмердүүлүктү уюштуруу системаларыбыз да айырмаланат, бирок кесиптик милдеттерибиз көп жагынан бизди бириктирет», — деди ал.

Форумдун жүрүшүндө кызматтын төрагасы Кыргызстандын соттук-эксперттик системасынын калыптанышы жана өнүгүшү, жүргүзүлүп жаткан реформалар жана аны модернизациялоонун келечеги тууралуу баяндама жасады. Эксперттик өндүрүштү санариптештирүүгө, мыйзамдарды өркүндөтүүгө, экспертизанын түрлөрүн кеңейтүүгө жана илимий-методикалык базаны өнүктүрүүгө өзгөчө көңүл бурулду.

Ошондой эле Кыргызстандын мамлекеттик эмес эксперттик ишмердүүлүктү өнүктүрүү, Соттук эксперттер палатасын түзүү жана адистерди даярдоо боюнча тажрыйбасы тааныштырылды. Мындан тышкары, 2026-жылы биргелешкен изилдөөлөрдү жүргүзүү, тажрыйба алмашуу жана эксперттик методикаларды өркүндөтүү максатында түзүлгөн Түрк мамлекеттеринин соттук-эксперттик мекемелеринин тармагынын (TFSN) келечегине өзгөчө көңүл бурулду.

Конгресске катышуу Кыргызстандагы жетишкендиктерди жана реформаларды эл аралык эксперттик коомчулукка тааныштыруу, чет өлкөлүк кесиптештердин алдыңкы тажрыйбалары менен таанышуу жана соттук экспертиза жаатындагы кесиптик байланыштарды бекемдөө үчүн мүмкүнчүлүк түздү.