Кыргызстанда медреселердин иш жүзүндөгү саны 200дөн ашат, бирок расмий маалыматтарда алардын саны кыйла аз көрсөтүлгөн. Бул тууралуу Джамиля Джаманбаева парламенттин жыйынында балдардын укуктарынын сакталышына жүргүзүлгөн мониторингдин жыйынтыгын тааныштырып жатып билдирди.

Анын айтымында, текшерүү медреселердин ишмердүүлүгүнө мамлекеттик көзөмөл жетишсиз экенин көрсөткөн. Мониторингдин алкагында өлкө боюнча 21 диний окуу жай текшерилген.

Натыйжада көпчүлүк медреселерде билим берүүнүн мамлекеттик стандарттары сакталбай турганы аныкталган. Бул балдардын келечекте кесиптик билим алуусуна жана коомго толук кандуу аралашуусуна тоскоолдук жаратышы мүмкүн.

Мындан тышкары, текшерилген мекемелерде санитардык нормалар, өрт коопсуздугу жана медициналык тейлөө боюнча талаптардын бузулушу аныкталган. Айрым медреселердин каттоо документтери жок экени белгилүү болгон. Бул балдарга карата зомбулук жана эксплуатация тобокелдиктерин күчөтөт.

Джаманбаева ошондой эле 2017–2025-жылдары мамлекеттен тиешелүү жөлөк пулун ала албай келген өспүрүм кыздын укугу калыбына келтирилгенин билдирди. Иликтөөнүн жыйынтыгында ага 518 миң сом төлөп берүү чечими кабыл алынып, күнөөлүү кызматкерлер тартиптик жоопкерчиликке тартылган.

Мониторингдин жыйынтыгы боюнча тиешелүү мамлекеттик органдарга диний окуу жайлардын ишмердүүлүгүнө көзөмөлдү күчөтүү жана балдардын коопсуздугун камсыз кылуу боюнча чара көрүү актылары жөнөтүлгөн.