2025-жылы Кыргызстандагы ресторандар, кафелер, барлар жана мейманканалар дээрлик 80 миллиард сомдук кызмат көрсөтүшкөн. Бул тууралуу Улуттук статистика комитети билдирди. Көрсөткүч 2024-жылга салыштырмалуу 24,6%га, ал эми 2021-жылга салыштырмалуу 2,6 эсе өскөн.

Бул каражаттын негизги бөлүгү — 82%дан ашыгы ресторандарга, барларга жана даяр тамак саткан башка жайларга туура келет. Алардын соода жүгүртүүсү 65,9 миллиард сомду түзүп, бир жылда 22%га көбөйгөн.

Мейманканалардын жана кыска мөөнөткө жайгаштыруучу башка жайлардын жүгүртүүсү мындан да тез өскөн. Бул көрсөткүч 13,9 миллиард сомго жетип, 2024-жылга салыштырмалуу 37,7%га көбөйгөн. Акыркы беш жылда алардын жалпы жүгүртүүдөгү үлүшү 8,5%дан 17,4%га чейин өскөн.