Кыргызстанда шахматты өнүктүрүүнүн жана жайылтуунун комплекстүү беш жылдык программасы иштелип чыгат, анын негизги элементи улуттук шахмат академиясын түзүү болмокчу. Документтин долбоорун мекемелер аралык жумушчу топ 2026-жылдын 1-августуна чейин даярдоого тийиш. Мындай чечим Министрлер Кабинетинин Төрагасынын орун басары Улан Маматканов «Ынтымак Ордодо» өткөргөн биринчи жыйындын жыйынтыгы боюнча кабыл алынды.

Жумушчу топ Президент Садыр Жапаровдун 2030-жылга чейинки мезгилге шахматты жайылтуу боюнча кечиктирилгис чаралар жөнүндө жарлыгын аткаруу максатында түзүлгөн. Өкмөт башчысынын орун басары эл аралык тажрыйба шахматты мектептеги билим берүү тутумуна киргизүүнүн жогорку натыйжалуулугун далилдегенин, бул балдардын аналитикалык ой жүгүртүүсүн өнүктүрүүгө өбөлгө түзөрүн белгиледи.

Жолугушуунун жыйынтыгы менен комиссия мүчөлөрүнө концепцияны иштеп чыгууну белгиленген мөөнөттө аяктоо тапшырылды. Программа академияны ачууну жана мектептерде шахмат сабактарын киргизүүнү гана эмес, бүткүл өлкө боюнча таланттуу жаш оюнчуларды аныктоо жана аларга ар тараптуу колдоо көрсөтүү үчүн масштабдуу турнирлерди өткөрүүнү да карайт.