Кыргызстандын Министрлер кабинети айдоочулук курамды даярдоо жана күбөлүктөрдү берүү тартибин өзгөрткөн токтом кабыл алды. Ага ылайык, өлкөдө убактылуу улуттук айдоочулук күбөлүктөр киргизилет. Токтом «Эркин-Тоо» гезитине жарыяланды.

Токтомго ылайык, убактылуу күбөлүк автомектепте төрт айдан кем эмес окуган жана квалификациялык экзамендерди ийгиликтүү тапшырган талапкерлерге берилет. Документти алуу үчүн арыз Электрондук кызмат көрсөтүүлөрдүн мамлекеттик порталы аркылуу берилет. Убактылуу күбөлүктүн колдонуу мөөнөтү 6 айды түзөт жана аны узартууга жол берилбейт. Бул документ Кыргызстандын аймагында гана жарактуу.

Ошондой эле жаңы тартип боюнча туруктуу айдоочулук күбөлүк убактылуу күбөлүктүн негизинде берилет. Аны алуу үчүн айдоочу 6 ай ичинде жол кыймылынын эрежелерин үчтөн аз жолу бузууга тийиш.

Эгерде айдоочу убактылуу күбөлүк менен жүргөн учурда үч же андан көп жолу жол эрежесин бузса, анда төмөнкүдөй чаралар көрүлөт:

• убактылуу күбөлүк жокко чыгарылат;
• окууну аяктагандыгы тууралуу маалымкат жараксыз деп таанылат;
• талапкер белгиленген тартипте кайрадан окуудан өтүүгө милдеттендирилет.

Токтом расмий жарыяланган күндөн, 22-майдан, он күн өткөндөн кийин күчүнө кирет.