Кыргызстандын президенти Садыр Жапаров жеке маалыматтарды иштеп чыгуу жана коргоо талаптарын бузгандыгы үчүн айып пулдарды караган мыйзамга кол койду. Белгилей кетсек, документке 9-октябрда кол коюлган.

Укук бузуулар жөнүндө кодекс жеке маалыматтарды иштеп чыгуу жана коргоо тартибин бузуу, ошондой эле эгерде бул аракеттерде кылмыштын белгилери жок болсо, аларды уруксатсыз тараткандык үчүн жоопкерчиликти белгилеген жаңы берене менен толукталды.

Жеке маалыматтарды коргоо талаптарын бузгандык үчүн айып пулдар:
• жеке жактар үчүн — 2,5 миң сом;
• кызмат адамдары үчүн — 10 миң сом;
• юридикалык жактар үчүн — 65 миң сом.

Жаза колдонулгандан кийин бир жыл ичинде кайталанган эреже бузуулар үчүн айып пулдар тиешелүү түрдө 7,5 миң, 30 миң жана 120 миң сомго чейин көбөйөт.

Балдардын маалыматтарына карата эреже бузуулар

Балдардын жеке маалыматтарын жана жеке маалыматтардын атайын категорияларын иштеп чыгуу жана коргоо талаптарын бузгандык үчүн кыйла жогору айып пулдар каралган:
• жеке жактар үчүн — 7,5 миң сом;
• кызмат адамдары үчүн — 20 миң сом;
• юридикалык жактар үчүн — 80 миң сом.

Бир жыл ичинде кайталап бузган учурда бул суммалар тиешелүү түрдө 15 миң, 40 миң жана 140 миң сомду түзөт.

Мыйзамдарды бузуу менен жеке маалыматтарды чек ара аркылуу өткөрүп бергендиги (трансчек аралык берүү) үчүн жеке жактарга 7,5 миң сом, кызмат адамдарына 17,5 миң сом жана юридикалык жактарга 65 миң сом өлчөмүндө айып салуу белгиленди. Бир жыл ичинде кайталап бузган учурда айып пулдар тиешелүү түрдө 15 миң, 35 миң жана 120 миң сомго чейин көбөйөт.

Мыйзам расмий жарыяланган күндөн тартып 10 күн өткөндөн кийин күчүнө кирет.

Reporter.kg’нин маалымкаты: Кыргызстанда жарандын жеке маалыматтары — бул түздөн-түз же кыйыр түрдө аныкталган жеке жакка тиешелүү жана анын өздүгүн аныктоого мүмкүндүк берген ар кандай маалымат.

Жеке маалыматтарга эмнелер кирет:
• Негизги маалыматтар: фамилиясы, аты, атасынын аты, туулган жылы, күнү жана жери.
• Документтер жана идентификаторлор: паспорттук маалыматтар, жеке идентификациялык номер (ПИН), ИНН.
• Байланыш маалыматтары: телефон номурлары, электрондук почта даректери, жашаган же катталган жеринин дареги.
• Кеңейтилген маалыматтар: үй-бүлөлүк абалы, кирешелери, билими, эмгек ишмердүүлүгү жана ден соолугунун абалы жөнүндө маалыматтар.
• Биометрикалык жана өзгөчө категориялар: манжа издери, сүрөттөр, медициналык диагноздор, диний же саясий көз караштар.