Таэквондо WT боюнча Кыргызстандын улуттук курама командасы Астанада өткөн эки абройлуу эл аралык турнирде — «Altaic Cup» жана «Kazakhstan Open 2026 G-1» мелдешинде өз оюндарын ийгиликтүү жыйынтыктады. Ондогон өлкөлөрдөн келген эң күчтүү спортчулардын катышуусундагы жогорку атаандаштык шартында биздин спортчулар 10 медаль жеңип алышып, Жапонияда өтө турган алдыдагы XX Азия оюндарына даярдыгын тастыкташты. Бул тууралуу КР Таэквондо федерациясынан билдиришти.

«Altaic Cup» турниринде курама команданын куржунуна күмүш байгени Богдан Пягай алып келди, ал эми Айдин Алтынбаев, Томирис Сулайманова, Злата Купцова жана Эрбол Эшимбеков коло байгенин ээси болушту. «Kazakhstan Open 2026 G-1» рейтингдик мелдешинде да өнөр көрсөтүү ийгиликтүү болду: Жолдошбек Токушов күмүш медаль жеңсе, Назар Жеңишбеков, Злата Купцова, Нурайым Орозбаева жана Хафиза Садырова коло байгелерге ээ болушту.

G-1 классындагы турнирлерге катышуу спортчуларга маанилүү рейтингдик упайларды топтоого мүмкүндүк берди. КР таэквондо WT ассоциациясынын жана машыктыруучулар штабынын системалуу иши буга чейин эле өз үзүрүн берди: Кыргызстан керуги, пумсэ жана виртуалдык таэквондо боюнча төрт олимпиадалык квотаны мөөнөтүнөн мурда камсыздады. Учурдагы улуттук курама тажрыйбалуу насаатчылар Дмитрий Пономарев, Акбар Айтахунов жана Улукбек Мураталиевдин жетекчилиги астында даярдыгын улантууда.