Кыргызстандын «Бөрү» атайын багыттагы отряды Орусиянын Екатеринбург шаарындагы «Свердловск» полигонунда өтүп жаткан атайын бөлүктөрдүн эл аралык «Вызов» мелдешине катышууда. Бул тууралуу Коргоо министрлиги маалымдады.

Сынак 24-августта башталган. Быйылкы жетинчи ирет өткөрүлүп жаткан мелдешке Кыргызстан, Орусия, Беларусь, Казакстан, Индия жана Сербия сыяктуу алты өлкөдөн 37 команда катышууда.

Мелдештин биринчи күнүндө кыргызстандык жоокерлер барымтадагыларды бошотуу боюнча көнүгүүнү аткарышкан. Мелдештин программасы төмөнкү тапшырмаларды камтыйт:

• барымтадагыларды бошотуу жана кармоо;
• тоскоолдуктар тилкесинен өтүү;
• эвакуациялоо жана буктурма уюштуруу;
• объектке чабуул жасоо жана дуэль.

Мелдештин максаты — атайын бөлүктөрдүн кесиптик даярдыгын, физикалык чыдамкайлыгын жана татаал шарттарда биргелешип иштөө жөндөмүн текшерүү. Сынак 30-августка чейин уланат.