Кытай бийлиги Пентагондун аракеттерин КЭРдин лидери Си Цзиньпин менен АКШнын президенти Дональд Трамптын Пекиндеги жолугушуусунда жетишилген келишимдерди бузуу катары баалады. Бул тууралуу КЭРдин Коммерция министрлигинин расмий билдирүүсүнө таянуу менен «Синьхуа» агенттиги кабарлады.

Басылманын маалыматы боюнча, Кытайдагы корпорациялардын «аскердик компаниялардын» тизмесине киргизилиши бийликтин билдирүүсүнө негиз болгон.

«Америка тарап эки мамлекеттин башчыларынын Пекиндеги жолугушуусунда жетишилген консенсусту этибарга алган жок. АКШ эки тараптуу экономикалык жана соода мамилелеринин жалпы кызыкчылыктарын көз жаздымда калтырып, улуттук коопсуздук концепциясын чечмелөөнү тынымсыз кеңейтип, кытайлык ишканаларга негизсиз басым жасоо үчүн мамлекеттик бийликти кыянаттык менен колдонду», — деп айтылат мекеменин билдирүүсүндө.

Анда АКШнын аракеттери эл аралык экономикалык жана соода тартибин олуттуу түрдө бузуп, глобалдык өндүрүштүк жана логистикалык чынжырлардын туруктуулугуна доо кетиргени, ошондой эле кытайлык ишканаларга олуттуу зыян келтиргени баса белгиленет.

Министрликтин өкүлдөрү Вашингтонду «туура жолго» кайтууга жана «ката аракеттерди» токтотууга чакырды. Болбосо, Пекин жооп кайтаруу чараларын көрө турганын эскертти.

Жакында Пентагон КЭРдин коргонуу сектору менен кызматташат делген кытайлык компаниялардын тизмесин кеңейткен. АКШнын Федералдык реестринин сайтында жарыяланган жаңыртылган тизмеге Alibaba маркетплейси, Baidu IT-гиганты жана BYD электрокар өндүрүүчүсү кирген.

Буга чейин бул тизмеге Huawei, Tencent жана NIO компаниялары киргизилген. Трамптын жарлыгына ылайык, Американын жарандарына жана фонддоруна аталган тизмедеги компаниялардын акцияларын сатып алууга жана алардын активдерине инвестиция салууга тыюу салынган.

Эске сала кетсек, Трамп 13-майдан 15-майга чейин Кытайдын борборунда болгон. Сапардын алкагында АКШ менен КЭРдин лидерлери мамилелерди «конструктивдүү стратегиялык туруктуулук» негизинде курууну макулдашып, ошондой эле соода жана инвестиция боюнча кеңеш түзүшкөн.