Дүйнөлүк көчмөндөр оюндарында көк бөрү боюнча медалдар үчүн дүйнөнүн булуң-бурчунан келген сегиз курама команда ат салышууда. АКШнын курама командасы менен болгон беттештин алдында Кыргызстандын улуттук курама командасынын мүчөсү, легендарлуу Манас Ниязовдун иниси Кыяз Ниязов бул спорттун түрү кандай өзгөргөнү тууралуу айтып берди.

Анын айтымында, көк бөрү тездик менен өнүгүүдө: уюштуруучулар оюнду коопсуз кыла турган жаңы эрежелерди киргизүүдө, ал эми талаага чыккан тулпарлар абдан тандалган тукумдуу аттар. Атаандаштык өсүп, каршылаштар күчтөнүүдө, бирок Кыргызстандын курамасы өз деңгээлин ишенимдүү кармап турат.

Ниязов оюндун өзгөрүшү боюнча өз байкоолору менен бөлүштү:

«Бүгүнкү оюндар абдан ылдам болуп калды. Оюнчулар аябай шамдагай. Мурда кыргыз жылкылары менен гана күрөшчүбүз, азыр алар таза кандуу жылкыларга айланды. Оюн тездеди. Илгери үч-төрт метр аралыктан чабышчу. Азыр бир-эки метрден катуу чаап, олуттуу жаракат келтирсең — дароо четтетүү. Ал эми бир четтетүү — бул сага бир голдун жоголушу дегендик. Ошондуктан азыр этият болууга, ашыкча чаппоого аракет кылышат. Оюндар ушундай өзгөрдү. Бул жакшы».

Спортчу көк бөрүдөгү аттын ролуна да өзгөчө токтолду — бул эл ичинде көп учурда бааланбай калган маанилүү тема:

«Көк бөрүдө ат — ийгиликтин 70 пайызы, ал эми оюнчунун өзү — 30 гана пайызы. Анткени баары атка абдан катуу көз каранды. Биз ат тандаганда эң алгач анын чапчаңдыгына, мүнөзүнө карайбыз: жоокер болушу керек, коркпошу керек, жакшы чуркашы керек, өжөр болбошу керек. Ушунун баарына аларды даярдайбыз. Анан дагы мындай болот: бир жигит күчтүү ат менен тил табышып, мыкты ойнойт, ал эми экинчиси ошол эле ат менен жыйынтык көрсөтө албайт».

Ниязов турнирдеги башкы тирешүүнү Казакстандын курама командасына каршы оюн деп күтүүдө. Анын айтымында, дал ушул беттеш мелдештеги эң кубаттуу жана келишпес чоң салгылашуу болот.