Кара-Суу районунун калкы менен жолугушуу учурунда президенттикке талапкер Садыр Жапаров мурунку мамлекет башчысы Курманбек Бакиевдин уулу Максим Бакиев жөнүндө суроого жооп берди.
«Максим Бакиев келди деп жатышат. Учак келгенден баштап, бардык жерде видеобайкоочу камералар орнотулган. Максимдин бул жерде эч кандай иши жок, ал келген жок. Калпты таратканда, жок дегенде Кудайдан корккула», — деди Жапаров.
Социалдык тармактарда Максим Бакиев Кыргызстанга учуп келип, Садыр Жапаров менен тымызын жолукканы кабарланган.
Максим Бакиев 2010-жылдын 7-апрелиндеги окуялардан кийин өлкөдөн чыгып кеткен, күнөөлүү деп табылып, ар кандай инстанциялардагы соттор сыртынан соттошкон. Бүгүнкү күндө ал Улуу Британияда жашайт.
