Жогорку Кеңештин төрагасы Марлен Маматалиев жер чет өлкөлүктөргө сатылат деген маалыматты тараткандардын арасында парламенттин депутаттары да болгонун билдирди. Бул тууралуу ал 2-сентябрда Жогорку Кеңештин жыйынында жер тилкелерин берүү боюнча талкууланып жаткан мыйзам долбоору тууралуу айтып жатып билдирди.

Маматалиевдин айтымында, парламенттик каникул учурунда коомчулукта мыйзам долбоору кабыл алынгандан кийин жер кытай жарандарына сатылат деген маалыматтар тараган.

«Биринчиден, мындай мыйзамды биз кабыл ала элекпиз», — деп баса белгиледи спикер.

Ал жерди узак мөөнөткө берүү мүмкүнчүлүгү буга чейин эле 1992 жана 2000-жылдары кабыл алынган мыйзамдардын алкагында болгонун түшүндүрдү. Анын айтымында, жер тилкелерин 49 жылга чейин берүү мүмкүнчүлүгү мурда да каралган.

Маматалиевдин айтымында, сунушталып жаткан мыйзам долбоорунда, тескерисинче, кошумча чектөөлөр каралган. Тактап айтканда, алынган жер тилкесин кийин турак жай курууга же башка максаттарга трансформациялоо мүмкүнчүлүгүн жокко чыгаруу сунушталууда.

Мындан тышкары, спикердин айтымында, жерди 49 жылга берип, андан кийин дагы узартуунун ордуна 10, 25 жана 49 жылдык мөөнөттөр каралууда.

Маматалиев мыйзам долбоору Жогорку Кеңешке келип түшкөндөн кийин депутаттар аны кылдат карап чыгып, биринчи кезекте элдин кызыкчылыгын эске алышарын белгиледи.

Ошол эле учурда спикер мыйзам долбоорунун айланасындагы так эмес маалыматтарды таратууга айрым депутаттардын да тиешеси бар экени тууралуу маалымат түшкөнүн билдирди.

«Бир-эки депутаттын да буга аралашканы тууралуу маалыматтар келди. Маалыматты тактап туруп, анан сиздерге жообун берем. Ал депутаттар менен дагы өзүнчө сүйлөшөбүз», — деди Маматалиев.