Кыргыз Республикасынын Мамлекеттик өнүктүрүү банкы Кыргыз фондулук биржасынын (КФБ) «В» категориясындагы листингине киргизилди. Мындай чечимди 2026-жылдын 24-мартында Листинг комитети кабыл алган, ал эми акцияларды соода аянтчасына жайгаштыруу май айында күтүлүүдө. Бул тууралуу Reporter.kg басылмасына Кыргыз фондулук биржасынан билдиришти.

КФБдан белгилешкендей, биржага чыгуу банкка ири улуттук долбоорлорду каржылоо максатында инвестициялык капиталды тартуу инструменттерине жол ачат, ошондой эле активдердин рыноктук баасын аныктоого мүмкүндүк берет.

Листингдик компания макамы банкты каржылык отчеттуулугун үзгүлтүксүз ачыктап турууга милдеттендирет, бул болсо эл аралык өнөктөштөрдүн жана ички инвесторлордун ишенимин арттырууга тийиш.

Банк ачык түзүмгө өтүү бүтүндөй Кыргызстандын фондулук рыногунун өнүгүшүнө түрткү берип, анын инвестициялык жагымдуулугун жогорулатат деп ишенет.

Reporter.kg маалымкаты: Кыргыз Республикасынын Мамлекеттик өнүктүрүү банкы — өлкө экономикасынын артыкчылыктуу тармактарындагы ири инфратүзүмдүк жана инвестициялык долбоорлорду каржылоо үчүн түзүлгөн адистештирилген мамлекеттик каржы институту. Коммерциялык банктардан айырмаланып, ал калкты чекене тейлөөгө эмес, улуттук өнүктүрүү программаларын — анын ичинде энергетика, транспорт, өнөр жай жана айыл чарба чөйрөлөрүндөгү долбоорлорду колдоого багытталган.