2026-2027-окуу жылынан баштап мектептерде 8-класстарга «Инженердик технологиялар» программасы окутула баштайт. Программа профилге чейинки даярдоонун алкагында киргизилет. Бул тууралуу Агартуу министрлиги билдирди.

Аталган сабакка жумасына 2 саат убакыт бөлүнөт. Анда окуучулар программалоо, робототехника, инженердик долбоорлоо жана IT-инструменттер менен иштөө боюнча билим алышат. Ошондой эле практикалык тапшырмаларды аткарып, өз долбоорлорун иштеп чыгышат.

Министрлик бул демилге окуучулардын чыгармачылык жана сынчыл ой жүгүртүүсүн өнүктүрүүгө багытталганын билдирди. Тиешелүү окуу программалары жана методикалык материалдар Кыргыз билим берүү академиясынын сайтында (www.kao.kg) жарыяланды.