Кыргызстан бажы алымын төлөбөстөн дагы 10 миң электромобил алып кирүүгө кошумча квота алды. Бул тууралуу Кыргызстандын Мамлекеттик бажы кызматы (МБК) билдирет.

Анын маалыматы боюнча, тиешелүү чечимди Евразия экономикалык комиссиясынын Кеңеши 2026-жылдын 9-июлунда кабыл алган. Ал 17-августтан тарта күчүнө кирет. Ошентип, 2026-жылга карата жалпы квота 15 миңден 25 миң унаага чейин көбөйтүлдү. Тарифтик жеңилдик Кыргызстанга алып келинүүчү «таза» электромобилдерге (ЕАЭБ ТЭИ ТНдин 8703 80 000 3 коду) жана ырааттуу гибриддерге (ЕАЭБ ТЭИ ТНдин 8703 80 000 5 коду) жайылтылат.

Бул жеңилдикти өлкө аймагында туруктуу жашаган Кыргызстандын жарандары пайдалана алышат.

Квотанын көбөйтүлүшү жарандардын электромобилдерди сатып алуудагы жана алып кирүүдөгү чыгымдарын азайтууга мүмкүндүк берип, өлкөдө экологиялык таза транспорттун өнүгүшүнө өбөлгө түзөрү күтүлүүдө.