Москва шаарындагы китепканалардын биринде көрүнүктүү кыргыз акыны Алыкул Осмоновдун кайра басылып чыккан “Менин үйүм” аттуу ырлар жыйнагынын бет ачары өттү. Бул иш-чара акындын 110 жылдыгына арналган маданий программалардын алкагында уюштурулду.

Иш-чарага Кыргызстандын Россиядагы элчиси Кубанычбек Бөкөнтаев, кыргыз жана орус адабият өкүлдөрү, Москвадагы кыргыз диаспорасынын мүчөлөрү катышты. Катышуучуларга акындын өмүрү жана чыгармачылыгы тууралуу даректүү тасма көрсөтүлүп, анын ырлары окулду жана музыкалык чыгармалар аткарылды.

Кыргыз Республикасынын Тышкы иштер министрлиги бул иш-чараны Кыргызстан менен Россиянын ортосундагы маданий-руханий байланышты чыңдоонун бир көрүнүшү катары белгиледи.