Экономикалык кылмыштарга каршы күрөшүү боюнча кызматтын мурдагы жетекчиси, прокуратура органдарынын экс-кызматкери Сыймык Жапыкеев кармалганын билдирди. Анын айтымында, окуя 18-октябрдын кечинде болгон. Ыкчам топ аны үйүнөн алып кетип, ал милиция бөлүмүнө үй тапочкасы менен барган.

Жапыкеевдин айтымында, ал шаардык милиция бөлүмүндө (ШМБ) сегиз саат болгон. Бул убакыт аралыгында ага кармалганынын себебин эч ким түшүндүргөн эмес. Ага арыз түшкөнүн жана ички иштер министри ойгонгонго чейин күтүшү керектигин айтышкан.

Кармалгандыктан ал кыргыз тилин билүү деңгээлин аныктоочу милдеттүү мамлекеттик тестирлөөдөн — «Кыргызтесттен» өз убагында өтө албай калган. Анын айтымында, бул тест президенттик шайлоого катышуу үчүн керек.

Буга чейин Жапыкеев Кыргызстандын президенттигине талапкерлигин коюу ниети бар экенин билдирген.