Мотоцикл башкарууга укук берүүчү A жана A1 категорияларын алуу эрежелери жаранда айдоочулук күбөлүктүн бар же жок экендигине жараша жүргүзүлөт. Бул тууралуу Транспорт каражаттарын жана айдоочулук курамды каттоо боюнча мамлекеттик борбор билдирип, категорияларды кантип алууга болорун түшүндүрдү.

Айдоочулук күбөлүгү бар жарандар A/A1 категориясын алууда практикалык экзамен гана тапшырышат. Бул сынакка катышуу үчүн төмөнкү документтер талап кылынат:

• айдоочулук күбөлүк;
• паспорт;
• №083 формасындагы медициналык маалымкат.

Ал эми айдоочулук күбөлүгү жок жарандар мамлекеттик автомектепте 2 ай окуп, андан кийин квалификациялык экзамен тапшырышат. Автомектепти аяктагандан кийин сынакка кирүү үчүн төмөнкү документтер берилет:

• автомектепти бүткөндүгү тууралуу күбөлүк;
• паспорт;
• №083 формасындагы медициналык маалымкат.