Кыргызстан Мусулмандарынын дин башкармалыгы Бишкек шаарынын Свердлов районунун имамы Садыбакас Дооловдун социалдык тармактарда тарап жаткан видеосу боюнча териштирүү жүргүзөт. Бул тууралуу муфтияттан билдиришти.

“Кыргызстан Мусулмандарынын дин башкармалыгы Садыбакас ажы Дооловдун айткандары боюнча тактоо иштерин жүргүзөт жана видеодогу сөздөр кандай максатта айтылгандыгын териштирет”, — деп айтылат билдирүүдө.

Буга чейин социалдык тармактарга тарган видеодо Садыбакас Доолов базарда малдын этинин кымбаттоосуна аялдардын ачык кийинип жүргөнү себепкер экенин айткан.