Айыл чарба министрлиги Эрлист Акунбеков Нарын шаарында саркынды сууларды тазалоочу станциянын курулушуна старт берди. Долбоор Нарын шаарынын ирригациялык жана канализациялык тутумун модернизациялоого багытталган.

Айыл чарба министрлигинин маалыматында, жаңы канализация тармактары курулуп, насос станциялары орнотулат жана 20 миң адамга ылайыкталган тазалоочу курулма ишке берилет. Бул чара Нарын дарыясынын экологиялык коопсуздугун камсыздоого шарт түзөт.

Долбоор Европа реконструкциялоо жана өнүктүрүү банкынын колдоосу менен ишке ашырылууда. Анын жалпы баасы 10,7 млн еврону түзөт. Буга чейин аталган программанын алкагында шаардагы суу түтүктөрү жаңыланып, суу жоготуулары азайтылган.

Эрлист Акунбеков бул долбоор калктын жашоо сапатын жакшыртууга жана аймактарды өнүктүрүүгө багытталган мамлекеттик саясаттын натыйжасы экенин белгиледи. Учурда өлкө боюнча ушул сыяктуу долбоорлор 25 шаарда жана 600 айылда жүрүүдө.