Дүйнөлүк банк Кыргызстандын экологиялык, климаттык жана инфраструктуралык демилгелерин колдоону кеңейтүүнү көздөөдө. Бул багыттагы кийинки стратегиялык өнөктөштүк макулдашуулары КР жаратылыш ресурстары министри Акыл Токтобаевдин Дүйнөлүк банк тобунун туруктуу өнүктүрүү («Планета») багыты боюнча вице-президенти Гуанчжэ Чэн менен болгон жолугушуусунда тастыкталды.

Диалогдун алкагында тараптар атмосферага мониторинг жүргүзүүнүн улуттук тутумун модернизациялоону, шаарларды жашылдандырууну жана жылытуунун экологиялык таза технологияларын киргизүүнү каржылаган «КРда абанын сапатын жакшыртуу» (AQIP) долбоорунун ийгиликтүү ишке ашырылып жатышын белгилешти. Ошондой эле эл аралык тоо күн тартибине жана республикада 2027-жылга пландалган «Бишкек+25» Экинчи Глобалдык тоо саммитине даярдык көрүү маселелерине өзгөчө көңүл бурулду.

Чек ара аралык өз ара аракеттенүүнүн туруктуу санариптик механизмдерин түзүүгө багытталган жаңы эл аралык пилоттук долбоорлорго катышуудан тышкары, тараптар жаратылыш мурастарын коргоо жана аймактарга инвестиция тартуу үчүн туруктуу экотуризмди өнүктүрүү жана улуттук геопарктардын тармагын түзүү боюнча долбоорлорду белгилешти. Жолугушуунун жыйынтыгында жашыл экономиканы андан ары илгерилетүүгө жана өлкөнүн климаттык туруктуулугун жогорулатууга даярдык тастыкталды.