Баткен шаарындагы №57 кесиптик лицейинде иш жүзүндө окубаган 6 студентке мыйзамсыз түрдө дипломдор берилген. Бул тууралуу Башкы прокуратура билдирди.

Маалыматта айтылгандай, Баткен облустук прокуратурасы аталган лицейде чет жерде жүргөн 6 студентке экзамендик баалар коюлуп, окууну аяктагандыгы тууралуу адистик дипломдор берилгенин аныктаган.

Аталган фактылар боюнча Кылмыш-жаза кодексинин 337-беренесинин 2-бөлүгүнүн (кызмат абалын кыянаттык менен пайдалануу) негизинде кылмыш иштери козголгон. Учурда тергөө жүрүп жатат.