Агартуу министри Догдуркүл Кендирбаева ата-энелердин окуу куралдарынын жетишсиздиги жана айрым мугалимдердин жумушчу дептерлерди өз алдынча сатып алуу талаптары боюнча нааразычылыктарына түшүндүрмө берди. Бул тууралуу ведомствонун басма сөз кызматы билдирет.

Кендирбаева мындай жагдайлардын бир бөлүгү жаш мугалимдердин туура эмес түшүнүгүнөн улам келип чыгып жатканын тактады.

Анын айтымында, айрым мугалимдер кийин кайтарып берүү үчүн таза сактоону талап кылып, окуучуларга акысыз жумушчу дептерлерге жазууга тыюу салышат. Бирок мындай материалдар окуучуларга акысыз берилет жана аларды кайтарып берүүнүн кереги жок.

Ошондой эле жаш мугалимдер жумушчу дептерлер акысыз берилиши керек болсо да, жаңылыштык менен ата-энелерден аларды өз алдынча сатып алууну талап кылган учурлар катталган.

«Мындай жагдайлар мугалимдердин түшүнбөстүгүнөн улам келип чыгууда. Бирок ошол эле учурда биз окуу китептеринин чыныгы тартыштыгы бар экенин моюнга алабыз», — деди Кендирбаева.

Министр күн сайын ата-энелерден жүздөгөн кайрылууларды алып жатканын жана мектеп директорлору менен байланышып, талаштуу маселелерди жеке өзү териштирип жатканын кошумчалады.

Эскерте кетсек, борбор калаанын базарларында мамлекеттик мектептердин окуучуларын акысыз камсыздоо үчүн арналган окуу китептери табылгандан кийин бул кырдаал чоң резонанс жараткан. Андан соң укук коргоо органдары алардын сатыкка кантип түшүп калганын териштире баштаган.

Окуу китептери базарларда табылгандан кийин УКМК жана Башкы прокуратура текшерүүлөрдү баштады.