Россиялык эркин күрөш боюнча балбан Заур Угуев (57 кг) кыргызстандык спортчу Бекзат Алмаз уулу менен күрөшкүсү келет. Бул тууралуу ал Алматыдагы Professional Wrestling League-8 (PWL-8) мелдешинен кийин билдирди.

Угуев Бекзат Алмаз уулу менен мурда-кийин күрөшпөгөнүн айтып, экөө күрөшүп калса, жакшы беттеш болмок экенин белгиледи.

Белгилей кетсек, Завур Угуев Токиодогу Олимпиада оюндарынын жеңүүчүсү, дүйнөнүн эки жолку чемпиону, Европа чемпионатында күмүш жана коло байге уткан. Ошондой эле Европа оюндарынын коло байге ээси.

Ал эми Бекзат Алмаз уулу 23 жашка чейин балбандар арасында Азия чемпиону болгон жана күмүш байге ээси, дүйнө чемпионатында (U-23) 2 ирет коло тагынган.