Кыргызстандык суучул Денис Петрашов Париждеги Олимпиада оюндарында брасс ыкмасы менен 200 метр аралыктагы жарышта жарым финалга чыкты.

Аталган дистанцияда 25 суучул таймашка түштү. Петрашов 2 мүнөт 10,99 секундда марага келди. Жыйынтыгында ал 16-орунду ээлеп, жарым финалга чыккан суучулдардын катарына кирди. Белгилей кетсек, жарым финалга убакыт боюнча эрте келген 16 спортчу өтмөк.

Жарым финал 31-июлга караган түнү Бишкек убактысы боюнча саат 02:00до болот. Финалга 8 мыкты спортчу өтөт.

Эскерте кетсек, Денис Петрашов Париждеги оюндардын алкагында экинчи ирет жарышка чыгууда. Ал 27-июлда 100 метр аралыктагы жарышка катышып, 23-орунду ээлеп калган.

Петрашов үчүнчү ирет Олимпиада оюндарына катышып жатат.